近況

講下近況...其實都唔近架喇...係親9月1 日, 得閒冇咩野做, 可以BACK UP 一下相...唔講唔知, 部NOTE2唔知點解有D相無故消失左...個殼仲係到, 但相的內容係0BYTE....都係耐唔耐BACK UP比較好....執開相, 咁就UPLOAD D 係BLOG 啦!

二月十四日,情人節 :) 去左食日本野, 雖然平時耐唔耐都會去下, 不過應節就再去食下啦~(哈...藉口) 經過上年海鮮事件, 都係平平地食好少少~呢餐都係30蚊美金左右, 好好味!

一人一個便當 友人叫左佢最愛的牛, 我就叫煎三文魚喇~~

作為一個香港人, 食前當然要影番張相先啦~不過有人好心急...差一秒都等唔切...

 

跟餐仲有壽司~!

******************************************************

大概6月左右, 去左友人的UNCLE度釣魚, 冇咩魚釣, 佢UNCLE就問我地去唔去 South Haven.果度好令架...個燈塔!! (因為太令了, 所以唔記得左影....)

 望出去就係MICHIGAN LAKE, 我諗如果你有千里眼, 應該可以望到芝加哥..
呢度好多有$$人住...好多大屋, 好迫....如果我有錢, 我唔會想D人出出入入都望到我個前後花園囉.... 仲有的係, SOUTH HAVEN比其他地方低兩三度, 又大風...冬天真係唔敢想像....

D人真係超寫意, 得閒出海, 曬下太陽
聽講, 有人係好少揸車去北面的MICHIGAN, 係揸船去囉.....因為揸車要6個鐘, 揸船..兩粒鐘就到, 又唔會塞船...有夠誇張!!

***********************

 友人的朋友係加拿大黎左, 去左GRAND RAPIDS, 原來附近有個越南的市場, 好似香港的小型超市咁!! 太開心了!!! 買左好多急凍魚蛋同急凍雲吞!! 仲有一大堆零食!! 離我住的地方都只係一個鐘多少少的車程, 一定會再番去掃多D貨!! 番家就用媽媽寄俾我的咖哩粉整咖哩魚蛋, 超級好味...好感動.....

 ***************

某月某日的半夜三更,  有一場超大大大雨, 又大風大雷...隔離屋都俾大樹壓到....
半邊屋都毀了....好彩冇人受傷, 但就唔住得人了.. 要搬走....聽聞佢地一路都唔知大樹倒了, 係聽到大雷, 醒了, 天花就正正係佢地眼前, 幾乎貼面, 先驚覺!!出門的時候, 見到有隻死了的鳥....應該俾雷打中的....
番工的路上, 都有好多樹倒了, 有一段街都停電, 有好多係Mc當當度發脾氣, 因為冇咖啡...人地都係岩岩有番電姐...咪等下囉...不過我杯橙汁就唔洗等..哈哈!

 **************

 我行商場的時候經過一間賣日本野的店, 雖然都係香港人開的, 好似D雜貨店咁...呢隻叮噹俾人放左係D刀刀劍劍後面...第一次去見到都唔知係咩黎, 只見到係叮噹 (大愛!!)

第二次, 佢仲係度! 問下老闆係咩黎, 佢話係錢箱, 仲可以半價賣俾我!!! 拿, 我冇講價架...可能佢賣左好耐都冇人要掛....不過唔緊要!! 我收留你!! :)

 ********************

 昨日, 去左寵物店, 睇魚魚, 倉鼠, 雀仔同待領養的貓貓, 我平時壓力大就會去下寵物店, 見到佢地傻下傻下咁, 又會見到人領養貓貓, 我就會心情輕鬆一D....仲有免費魚缸水測試, 原來....果兩條清道夫製造左大量的排泄物....搞到D水超晒標.....又生得超大條, 原本都係得吋幾....而加好食好住, 大過隻手掌...見佢地SIZE夠大, 就放生佢地落友人UNCLE的水塘, 果度大把野俾佢地食...佢地都係屬於大自然嘰.....雖然有唔捨得, 但我個小小的魚缸真係唔夠佢地兩條住....

......好難捉囉佢地......希望你地快高長大喇!!!

 *****************

貓貓們?? 哈...每日唔係食就訓....肥肥白白咁~

 

冬天的時候, TIGGY唔知做咩, 坐左係個暖爐後面, 好似坐牢咁款...哈哈

 

買左個籃俾佢地, 用黎放玩具, 雖然佢地識攞出黎玩, 但唔識放番入去囉...哈哈哈...

不過佢地超鍾意個籃..要輪流訓...傻瓜!

一肚火……

兩日前，收到通知，我的工作證通過左喇!!! 太好了，我的人生大Project又完成左一項了

而加我可以……出國去遊玩啦、番香港啦、最重要係可以 借錢買屋啦!! 終於都有機會搬走，擁有自己的屋。

…………………………………………………………………………
電郵係一樣offical的野，你地成班好似岩岩係high school畢業出黎咁……

標點符號又唔加，又用埋晒d簡語，仲要打錯字! 咁重要的資料你就咪寫到一舊舊。冇人睇得明，你老闆仲要扮勁咁企出黎話係佢叫你咁寫。係度大吵大鬧真係可以解決問題咩？望真d，又唔怪得你嘰……原來你老闆都係你同校出身。
真係差d叫埋"你老闆!"……出黎同我作番50句句子!

最後你咪又係要我地幫手解決問題……你唔覺頭先你浪費左我地好多時間咩？你估我真係得你一個project要搞咩……呢樣又話urgent ，果樣又話聽日要，我聽日俾粒塵你就得!

抽到喇!!!!

我抽到美國工作證喇!!!!
雖然仲要等2~3個月先批到, 但我終於可以PLAN我番HK喇!!
好開心!
 老闆知道左之後, 佢話下一步就係綠卡喇!!!YES!!


星期六去左慶祝!!!食日本野, 跟住去SHIPPING...
買送俾朋友的禮物同mother's day 的禮物
仲有我FD買了一SET手飾俾我>< 雖然要攞去改SIZE, 個SALE俾番個吉盒我地...., 但是好開心!!! 多謝晒!! ^^
(仲有半價)哈哈..

搵工作難...KEEP住份工仲難...

4月....H1B VISA 接受申請....
我冇碩士學位, 只可能申請普通QUOTA....
今日公佈一共有172,500人申請...但普通的只得65,000人可得到...
其中果5千幾位留俾新加坡同另一個國家....
我一個人申請一個位, 只得40%會抽中......

好難得係美國搵到工...仲以為前途會好過係HK...
但, 原來更難的事係後頭....

我知我冇H1B, 公司唔會幫我搞綠卡...我自己又唔夠得$$讀碩士...
雖然仲有出年一次機會....但如果都抽唔中呢....?
我會冇左份工, 但唔係因為做錯野俾人炒, 而係因為冇工作證要走.....

我精神壓力大到爆燈........因為我知道....
運呢家野, 好多時都唔係我度......

2013回顧

2013 年，發生了好多事……但都簡單的記一記了。

1月，有了新魚缸！魚魚到了而家都仲在生，真奇蹟！我養的小動物同植物從冇過三個月……貓貓除外，哈哈

2月，冇咩特別，除了趕畢業專題之外……當時大家都仲覺得有大把時間，哈哈哈

3月，final project尾聲……而加先知，材料唔夠，做唔晒測試……仲有萬樣的presentation 排隊而黎

4月，畢業月。大考前一星期，final project presentations....係大的auditorium，開放日咁，咩人都可以睇，可以問，所以答案都計落grade到，好緊張但完左又覺得冇乜野
畢業典禮……好悶，但都終於畢業了！雖然爸爸媽媽冇黎，但心意收到了，畢業袍可keep.一定會補番畢業照的
貓貓生日，同我相差一日的生日……就一齊慶祝啦！

5月，畢業=失業……身邊好多同學一早就搵到工，因為美國人唔洗工作簽證……搵工，先知有好多公司都係以要工作簽證為由，連interview的機會都冇……

6月~7月，不停的搵工，每日8點起身，就上網搵，世界各地都搵，冇回音……
去左兩個interview 

去了L.A.見表姐們, 友人第一次坐飛機...玩得好開心...原來表姐都搵工中!大家加油!

8月，自己定了9月尾去埋學校的career fair都冇希望就返香港……
突然有second interview …雖然覺得自己frist in做得唔太好，但都盡做！兩星期後，當另一個phone in 前的15分鐘，收到電話，second interview 的公司俾左offer我。！！！雖然未知工作簽證果度點，但我2014先要諗，而家有人請，當然好啦。就算佢地最後唔肯幫我出工作簽證，我有工作經驗都好。8月的最後一星期半接收個見習的工作。三個月的試用期開始

9月，見習離開，自己一個做。仲係有好多野唔識，周圍問人，好彩同事們都好好人。

10月，終於都上手了，同sales出去客的公司，量地…畫圖…返公司再畫畫畫…俾客睇，唔合心意再改改改，又再畫畫畫…日子過得好快……見識到各大公司的工廠同做事方法……大公司果然唔當人係人咁用……

11月，雖然有錯誤，但老闆都好人。冇俾人鬧爆，但咁反而自己會反省仲多……雖然唔係錯大野，但都好內疚……大老闆的手法係，自己解決好就ok。但自己都會諗，明明可做好的事，點解咁大意…

11月22日，三個月的試用期到了，雖冇正式的report，都只係call入房做總結。呢個比interview 更緊張…老闆們都好滿意我的工作表現，加了人工! 公司都請了律師幫我搞工作簽證，話一路落去會幫我搞埋綠卡!

12月，公司包餐廳開聖誕會，任叫食物酒水…
去了Farmington Hill做smart cart training ，第一次自己揸兩個半鐘頭車……第一次自己住酒店，為期三日。打死下次都唔自己去，就算係，都租車去，底特律果頭太恐怖了…
月尾，每月大會又開聖誕會……
收到神秘獎金，因為唔係人人有，有1K…美金，又有一百蚊超市禮品卡，公司對我真好…自己再出錯就會更內疚……

呢年就係咁……由學生，畢業，失業，而家我就係公司的項目工程師……部門都係得我一個，有咩都係搵我，但通常揾親我都唔會係好野……