12月30日

今日要早起⋯ 9點20分要去到專科牙醫，我想箍牙⋯下排有少緊迫。睇下可唔可以整全透明果種牙套。

準時去到⋯個口俾人影完一輪，照埋x-ray。等見牙醫⋯

幸好，我d可以用透明果種，不過個價錢係5770美金⋯姐係大概4萬港幣，全包宴。為期18至24個月⋯

雖然公司每月有醫療，但牙保一蚊都唔包⋯ 睇黎我都係供埋架車先再算了⋯

12月29日

今日冇咩野好做⋯明日去見專科牙醫

12月28日

同上............全日在家
今日有落雪!!!不過聽聞聽日又溶雪...咁的天氣真係好奇怪
12月尾都仲未有積雪

12月27日

今日全日都係屋企...冇出過街
 好悶呀...冇咩節目, 又唔想出街...省油....

12月26日

今日去左Grand Rapids 個比較大的商場。果頭都有一間越南的超級市場，感覺有d似家興⋯連超市的味道都似

好有家的感覺⋯

係果度買左個火煱！亞茜佢教識我，原來係美國都可以打邊爐！連小肥羊的湯底都有得賣！而加只要買個單頭電爐就得喇。

之後去左商場⋯超多人！ 可能因為聖誕過後，加上差唔多間間都有折的關係⋯

買左兩對鞋俾友人做聖誕禮物；買左個散紙包俾爸爸，免得我媽收到禮物佢冇份，會喊濕枕頭，哈哈哈

之後番去公司附近的中國人餐館食晚餐，原來我個friend仲係果度做！佢之前去左中國做交流，仲以為佢會轉左工⋯

友人之前買左個比較平的小提琴⋯

好耐冇玩了⋯指法都生疏了⋯咁多年黎其實我一直都想重新攞番起個琴，無奈的係，我知自己已經大不如前⋯難免有些失落感⋯

最近玩左一次，雖然只係可以玩d比較簡單的歌，但果種感覺的確令人懷念！

有睇過買一個比較好少少的小提琴⋯但開價都係USD500以上⋯有d貴呢！

12月25日，聖誕節

美國的聖誕節係咩鋪頭都唔開的⋯連Mc記都唔會開⋯平時24小時的超市都唔開⋯聽聞最快都要下午六點先開番⋯

幸好！downtown其中一間油站有開！佢地有間subway！好合適懶人唔想煮飯的我地，哈哈哈！

12月24日

原本亞茜佢地聖誕過後先會走，咁我就唔洗去友人亞叔到過聖誕晚餐⋯ 但佢地早走左，所以禮貌上係要到的。

友人的家對錢好重視⋯上次感恩節已領教過⋯幾乎全程都係講邊個搵幾多，做咩會發達，自己又買左d咩貴野會貴過你架車咁⋯再唔係就抱怨自己的工作有幾討厭⋯我印象中大家係冇咩笑聲，除了恥笑聲外⋯

我家人親戚好少會講呢d，就算係問，都要私下八下就算⋯一家人坐埋一齊就唔會放錢上桌，因為真係會傷感情。正能量真係好重要！除左錢，其實都有好多話題可以聊，例如夢想啦，計劃啦，遊戲啦，低能IQ題啦，經驗分享等等⋯雖然好多事到最後冇錢係萬萬不能，但個focus可以轉換一下。

晚餐由下午三點開始，到6點，我對友人打眼色，我真快頂唔順了⋯友人的親戚們戰火連連⋯只求唔好中我便好了⋯

之後去左友人的朋友度，終於可以清靜一下了⋯輕輕鬆鬆的傾計，說說笑，我本人比較鍾意咁樣的生活。

12月23日

今日好難得佢地會早過12點鐘起身！

但原來佢地要出發了⋯因為搬運公司吹佢地返去。

我同友人送左d酒俾佢地，而我就俾埋我備用的一套毛巾佢，雖然唔貴重都冇咩心思⋯但希望你地鍾意啦！

茜洗完衫，去左Mc記食野，返到家佢地就出發了。

⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯

佢地走左之後，我就返左公司攞bonus。

咁岩見習係老細房，見唔到一面。

當我去到我桌的時候，見到見習件褸掛左係我平時用開的掛鉤上⋯當時第一個反應係佢到底係咩意思？⋯我叫佢可以用我電腦攞資料姐，唔係叫佢坐我位喎。希望我係諗多左啦⋯敏感左d啦。

之後去左商場，買禮物俾我媽。話說佢中醫藥課程順利畢業！要買d野俾佢的。

雖然我出左bonus，但都唔太多，小女我Prada就未買得起住⋯Coach都還可以啦，嘻嘻。

同友人行左一日街

原來我架車呔係冇問題，架車之所以係路面濕滑的情況下會兩頭滑，完全係因為唔夠重。亞茜佢地黎果幾日都有落雨，但架車一d都滑⋯睇黎我係時候要買番幾包貓沙放後座了。

12月22日

今日冇咩野做，去左world market，因為亞茜的老公鍾意去。

買左少少野⋯

之後去多幾個地方就返家了。

呢幾日都玩左好幾個game...

Monopoly 的traveler 版本啦，亞茜成日都跟住友人尾，狂交租⋯而我，就狂俾佢地交換地區變first class stamp...

又玩jenga....呢個係一個好瘋狂的遊戲⋯多得友人同茜老公的幫助，呢個遊戲變得唔簡單⋯手心狂出汗！

Uno啦，其實真正的玩法係每次只放一張牌，最後同第一張都可以係function 牌⋯uno係西班牙文的'一'咁解。教友人同茜老公玩港版uno⋯⋯佢地覺得不可理喻，哈哈哈！

12月21日

今日去左Ihop度食早餐，之後去左Air Zoo...

已經有7年冇去過了⋯好似冇咁多野玩，有少少悶。最開心的原來呢度都有得賣太空雪榚！

之後去左Target行街，要買聖誕禮物俾友人的爸爸，叔叔同婆婆。

回到家，亞茜話有野俾我地（？）

一打開原來係個indoor grill!! 之前都想買的了，唔知點解到最後不了了之⋯太有心了！

我同友人都唔知點回禮好⋯知道佢地黎緊會去road trip，唔想佢地攞咁多野。

其實今朝一早起身check email⋯快俾個見習激死⋯寫明要做咩都可以錯⋯

上星期五俾張紙你就好睇下啦⋯唔明你就問啦⋯唔好下下都懶醒好冇？

12月20日

亞茜佢地決定早d黎，結果半夜1點就到了⋯^_^"

等到佢地門，我就訓了。希望佢地會唔介意超軟的床。

我本人就鍾意硬少少的。

到佢地起身，友人的'老闆'黎到，想佢整整部電腦。一等就等到下午⋯

去左dad's 度食早餐，好大份⋯

之後去左flea market，係之前同友人發現的。完左就去walmart，亞茜要買毛巾⋯

返到家，晚餐。之後又去多次Walmart，佢地先發現Three Rivers 係最近的了，都要15分鐘車先到。買左d遊戲，啤酒咁⋯

大掃除

今日全日打掃...覺得自己好厲害! 屋企乾淨的感覺真好....但唔知可以維持幾耐...

又一天，下雪天

今日又係開會⋯每月列會。

完左之後有大食會，超多好野食，可能係因為每人都只帶一樣，所以心思都多左。

完左之後就去洗車，下星期有人黎⋯嘻嘻嘻。事關佢地要大洗我車內，要等3個鐘⋯我就係商場行足咁耐，間間鋪都俾我行過了⋯好彩都忍得手，冇大出血⋯

今日落大雪⋯冰再加上大量的雪，好多交通意外⋯係高速公路連接的橋，有架車應該係失控再打轉⋯半掛住係橋端⋯一動的話應該⋯

洗完車去了超市，今日把心一橫，買左個Kitchenaid mixer⋯⋯好貴不過好鐘意！我通常考慮左一整個月都仲係好想要的事物，就可以買了。呢部仲可以配唔同的配件，可以整意粉呀，腸仔咁⋯期待！

走時超級大雪⋯一路返屋企都係用龜速，天又黑，完全大雪到睇唔到自己係唔係在路上⋯幸好最後都安全回家。

我正式放假喇～聽聞大老闆下個月放一個月大假⋯聽聞佢想過半退休生活⋯

開會⋯再開會⋯不停地開會⋯

今日不停地開會⋯以前覺得開會係一件好型的事，但返工之後，成日都要開會，要做的野就每小時堆積起來⋯覺得其他冇會開都係一件唔錯的事。哈哈⋯

明日公司搞聖誕party，大食會。呢度人叫pot luck。挑戰整果撻⋯原來做甜品真係唔易⋯個底餅自己整，加加埋埋都要4小時先完成⋯

之前的作品，試驗一下會唔會成功。今次俾我買到士多啤梨，應該會好食d。

食品安全

今日和大老闆外出開會。有學校開班教食物安全和生產過程，想睇下我地幫唔幫到手⋯

之前都見過面，傾過佢地課程大概係想教咩⋯佢地仲有幾個星期就開學了，叫我地去睇下佢地的計劃⋯結果，同之前的計劃完全唔一樣⋯原本係由接收農產品到包裝入沙津盒⋯變到只係清洗蔬菜，然後放入大型可再用箱⋯食物仲會直接接觸到個箱。

美國的食品安全管理好嚴緊，都唔知佢地有冇研究過⋯仲要係送去醫院，感覺上醫院係唔會收呢d產品⋯仲要不停咁同我地講佢地唔係食物生產商，又話醫院會煮熟先食，話個箱又會有蓋⋯其實又有咩關係呢？你地方食品安全唔合格，你一日只生產一盒沙津都係唔pass架啦⋯唔關產量事。唔通叫買沙津果d人煮熟你先好食咩⋯

大老闆係返辦公室的路途中話，幸好佢唔係交學費果個，如果唔係俾咁多錢上堂都只係教識你點洗菜。

放空⋯

今早揸緊車番工的時候，明明記得要上網搵一下資料⋯但完全唔記得左⋯

直到下午，我原本想到要搵一下其他資料，先記得今早係要搵d野。當我望出窗外，好努力咁回想我今早到底要搵咩的時候，有架車經過⋯打斷左我思路，我連我下午要搵的第二樣野係乜都唔記得左⋯

我個腦仲要放空幾耐先放大假啊⋯

仲有4日半的日子

每逢星期一都會超超超累⋯仲有4日半，我就放假喇！雖然冇咩野做，但都超期待的！

明年5月，友人個妹就結婚了。恭喜晒！

明年的4月，我又去training 喇⋯次次去親我都破費⋯因為總有好的商場係附近，而我住果頭又冇的⋯總會發揮鍾意行街的精神⋯幸好4月出三次糧，哈哈哈。

每日我返到家都會咁樣貼住我 <3

今日無所事事⋯

近排睇番d舊劇，以前的真係好睇好多。

明日又星期一了⋯再下星期我就放兩星期啦啦啦～

星期六

今日⋯訓醒都好似冇訓過咁。

不過都不減想去shopping的意欲！事關收到公司送的現金禮券。去了upgrade 廚房用具，燈泡全換新出LED燈。 超光！用電量減半，希望黎緊未來的電費單唔好再咁高喇⋯

去了Buger King食午/晚餐。之前睇香港的新聞，三間都突然關閉⋯其實Buger King 都幾好食丫，我覺得健康過M記⋯至少佢地的薯條放得耐係會發毛變綠⋯

話說我買的車中，有條M記薯條，幾個月後，都仲係完整無缺的⋯好恐怖啊！

人，八起上黎真係冇人可阻

話說公司有位A小姐好關心同事⋯每日都同每人吹一轉水先開工，問下你昨日做過咩呀，你鄰居有冇拍你門咁⋯咩都吹一餐，就黎連我果日著咩色底底都問埋⋯

有日⋯我午飯出左去買野食加入貨（零食），放好係櫃裏，因為我唔鍾意自己張桌好似特賣場咁⋯包裝袋呀，單呀果d已經掉了入垃圾桶。

呢個時候A小姐專登靛個令彎行入黎問我買左咩⋯

我咪話都係果d零食咁啦⋯果頭未講完，A小姐已經伸手摷我個垃圾桶，搵番張單出黎睇⋯冇錯，係摷！

我真係當場滴汗⋯⋯⋯人的好奇心真重。

今晚係公司一年一度的聖誕晚宴。第一次咁多人到齊。

選了個角落位坐，唔係太想做心中點⋯

對於我呢d社交白痴黎講，一晚呢類餐敘，真係好累⋯返到屋企都真係得番半條人命。

好處：識更多人。認識到同事放工後的另一面。有免費的晚餐同無限飲品提供。

壞處：要吹足4小時，我聲都沙晒。仲要不忘顧形象，記得坐低時要合腿⋯長期保持笑容。

有人講左笑話請記得大笑。(*^_^*)

沒有見習的日子

昨日都係個見習講我先記得，佢要準備考試，下星期連呢兩日都唔會返。

又回到冇左見習幫助的日子⋯算吧，我都同意佢專心溫習好過。打工可以打一世。

友人昨日終於考晒試喇！恢復自由之身，重投社會工作。哈哈，恭喜恭喜。

上個月訂左anode rod，因為自來水⋯好臭！沖涼都好似俾便便由頭沖落腳咁⋯

訂果時職員話12號就會有貨，但到昨日都仲未寄出。打去問下到底發生咩事，原來係廠冇貨，但話有鋪in stock⋯⋯

明明冇貨要我地訂，結果廠冇貨鋪有貨⋯? 

打去鋪問，真係有3支in stock⋯⋯個職員話佢地岩岩先carry⋯⋯

所以上月訂的冇貨，不過今月鋪有現貨。

12月了⋯

一直都好想寫番日記，但我實在太懶了⋯好似變左年記咁

今年4月，終於都搬左出黎住，雖然只係隔離果間屋，但都話曬係租一間屋。

呢個暑假，冇咩野搞。都係為新居upgrade 。

9月，公司終於肯請個見習番黎幫輕下我，可惜聽聞出年到佢畢業的時候，應該再唔會有呢個職位⋯

一年間，公司的人和事都出現了好大的變化。自己可能仲未夠經驗，有人走總係有d唔慣⋯

長貧難顧

冇錢，唔係問題。
人生都可以好開心，唔洗下下用錢去衡量。得閒到外面玩下貓，同人吹下水又一日。
雖然冇錢係萬萬不能，但我搵幾多人工又關你咩事?? 唔通我搵幾多又要分番幾多%俾你咩~~~連我家人都唔會過問的私人/私隱問題，又幾時到你問??
租金都唔係你收，所以你係冇權當你自己係度係大晒!
一日到黑就只係度埋怨生活難，又冇錢用，但好明顯就係你唔識理財啦！
又到每年報稅，年年都話政府俾唔夠錢，又話唔信人，結果咪又係叫我地幫你搞……年年都唔買報稅碟，又成日話印影機冇墨……聽講都冇墨左幾年喇啊？打印機的墨係貴架啦！你唔係第一日先知呀？你估我果d自己生出黎架?! 政府回唔夠錢??有邊個會覺得回多左??? 咁佢回唔回，你都係要打工架啦？咁嘈咩姐?
乜叫人幫手的態度，語氣係咁架咩？講兩句唔岩聽又發晒脾氣……咁叻，又唔見你自己做??
超市大減價唔代表要買晒一年要食的野，然後忘記了，兩三年後攞黎當垃圾…… 咩都唔做，又唔執屋，又話返工好累，你真當我地係工人呀？呢度唔係得你返工有壓力架! 一開口，句句都係負能量!! 我就黎癲喇!!!

相處好，同住難、長貧難顧係完全應驗晒……雖然我唔係好有錢，但唔會樣樣買，樣樣都埋怨……除左你!!!
唉!!!!

幸好，呢個人唔係友人。